Фејсбук денес започнува со воведување на сервисот на видео повици кој на корисниците ќе им овозможи бесплатно телефонирање во рамките на Скајп мрежата...

Извршниот директор и основач на Фејсбук, Марк Цукерберг на конференцијата во седиштето на компанијата во Пало Алто, Калифорнија, рекол дека со компанијата Скајп потпишал договор за партнерство кој ќе овозможи интеграција на Скајп во платформата на Фејсбук.

Цукерберг рекол дека најдобар дел од тоа партнерство е што корисниците нема да мораат повторно да го подесуваат својот Скајп профил во рамките на Фејсбук, туку ќе биде доволно еднаш да се инсталира додаток кој тоа ќе го направи автоматски, за што се потребни 30 секунди.

Извршниот директор на компанијата Скајп, Тони Бејтс рекол дека во почетокот преку Фејсбук ќе бидат овозможени сите бесплатни Скајп сервиси како разговор и четување во рамките на мрежата.

Тој додал дека за покасно се планира воведување на платените услуги на Скајп сервисот како што се повикување надвор од мрежата и праќање СМС пораки на мобилните телефони.

Интеграцијата на видео повиците ќе им овозможи на Фејсбук адекватно да одговорат на конкуренцијата, посебно на компанијата Гугл кои неодамна поставија своја социјална мрежа Google+, на која е еден од главните адути е токму видео повиците преку сервисот на Google Talk.

На претставувањето на новиот сервис на Фејсбук, Цукерберг потврдил дека бројот на корисници на таа мрежа во светот надминал 750 милиони, но истакнал дека бројот на корисници не треба да биде главниот критериум за социјално вмрежување.

Цукерберг најавил дека Фејсбук ќе им препушти и на други компании развој на апликации, со што ќе бидат поквалитетни. За тоа време, Фејсбук ќе се сврти кон развој на апликации за мобилни телефони.