Очигледно, револуцијата во мобилните телефони, кои веќе поседуваат тач скрин дисплеи, не беше доволна за технолошките гиганти. Американската компанија PLX Devices на своите клиенти веќе го нуди уредот "XWave", што "ги чита мозочните бранови на луѓето" и ги поврзува со секој вид технологија, објавија медиумите во САД.

Создавачот и извршен директор на компанијата Пол Лоучеронкул објави, дека е прашање на време пред новите производи како "XWave" да влезат во секојдневниот живот на обичниот граѓанин.

"Човечкиот мозок е најмоќното и најкомплицираното нешто во универзумот. За прв пат во историјата, ние успеавме да ја скротиме неговата сила и да ја поврзаме со секојдневната технологија ", изјави директорот на PLX Devices.

"Со новиот уред можностите за иновации веќе немаат граници ", додал Пол.

Во моментов "XWave" може да работи исклучиво со мобилните уреди на технолошкиот гигант Apple, вклучувајќи iPhone, iPad и iPod Touch.

Новиот уред, кој на прв поглед изгледа како хенсфри за мобилен телефон, е целосно безопасен, бидејќи "само ги чита" мозочните бранови и "не пренесува ниту испраќа било какви сигнали".