Летото е лоша сезона за мобилните телефони, особено кога се оди на море, бидејќи уредите се изложени во животна средина, која е опасна за електрониката...

Сонцето, водата и песокот можат трајно да ги оштетат електронските апарати, а особено мобилните телефони. Еве неколку совети како да ги заштитите:

Обидете се да не ги оставате на сонце или во автомобилот. Ако тоа не можете да го сторите, тогаш не оставајте го со екранот кон сонцето, бидејќи тоа може да му наштети. Ако пак вашиот телефонот бил изложен на сонце и екранот целосно потемни, исклучете го телефонот, почекајте да се олади и повторно вклучете го. Ако телефонот е изложен на висока температура може да дојде до истекување на батеријата или во ретки случаи може да дојде и до експлозија.

Независно од тоа, колку е заштитен телефонскиот апарат од прашина или песок, тие можат сериозно да ја оштетат електрониката. Најзагрозени делови од песокот се конекторите и тастатурата. Нема да боде лошо ако го заштитете телефонот со некоја силиконска футрола. Ако телефонт ви падне во песок исчистете го со крпче. 

Ако пак, ви падне во вода веднаш извадете ја батеријата. Ако падне во солена вода, експертите советуваат, телефонот да се стави на кратко во слатка вода, бидејќи, кога ќе се исуши солената вода остава минерали кои ги уништуваат дигиталните врски на уредот. Не треба телефонот да се суши со фен, бидејќи на тој начин само ќе ја истуркате водата до таму каде што не стигнала. Оставете го телефонот околу половина час сам да се исуши, а потоа ставете го на место кое ја прима водата, на пример чинија со ориз. Оставете го така барем 12 часа, по што можете да ја вратите батеријата назад.