Најголемиот руски пребарувач Yandex (Јандекс) ја стартува .com верзија на услугата, со што се обидува да му конкурира на Google, пишува рускиот весник "Ведомости", цитирајќи го портпаролот на Yandex Очир Манџиков.

Манџиков изјавил, дека рускиот пребарувач ќе стартува со тест верзија на посебен домеин yandex.com што ќе работи паралелно со yandex.ru.

Претседателот на рускиот инвестициски холдинг "Финам" Владислав Кочетков изјавил за рускиот весник дека, стартувањето на меѓународниот пребарувач Yandex претставува повратна точка во историјата на рускиот интернет.

Според меѓународната маркетинг компанија comScore, во 2009 година Јандекс го завзел седмото место во Топ 10 најпопуларни пребарувачи во светот, со познатите имиња како што се Google, Yahoo и кинескиот Baidu.

Основачот на друг руски пребарувач nigma.ru Виктор Лавренко за весникот "Ведомости" изјавил, дека Јандекс ќе мора да регистрира 20 милијарди страници и да ги промовира своите услуги во странство, за да конкурира во светски размери. Тој изразил увереност дека Јандекс може да се справи со предизвикот.

Манџиков сепак, изјавил дека засега Јандекс нема да ги промовира своите услуги во странство, бидејќи сеуште е пребарувач наменет претежно за руските корисници.