Oд Фејсбук признаа дека дошло до "ненамерна грешка" и инсистираат дека ничија приватност не е загрозена. Но, прашање е какви уште "ненамерни грешки" има на оваа друштвена мрежа...

Фејсбук призна дека "лајковите" на некои веб страни ги клика наместо корисниците, секако без нивно знаење. Еден американски експерт за интернет сигурносни прашања открил дека "лајкот" се додава сам од себе при четување на двајца пријатели. Доволно е едниот од нив на другиот да му прати линк на некоја веб страна и тогаш таа автоматски ќе добие "лајкови" и од двајцата корисници.

Истата работа се случува и со оставање коментари на членовите на веб страната која го користи составот на Фејсбук за коментирање.

Во Фејсбук убедуваат дека станува збор за ненамерен пропуст кој имаат во план да го отстранат. Велат и дека ничија приватност не била загрозена, со оглед на тоа што ненамерното "лајкување" се случувало кај различен број луѓе на кои некоја страница им се допаѓа, додека корисниците чиј "лајк" е искористен останале анонимни во целост, без никакви назнаки за тоа на нивниот "timeline".

Професорот Алан Водвард се прашува што ли уште на Фејсбук се случува автоматски, без знаење на неговите корисници.