Едночасовниот прекин на работата на Gmail сервисот ги изненади корисниците ширум светот.

Компанијата Гугл уште нема дадено објаснување за прекинот во функционирањето на својот веб мејл кој се случи вчера вечер.

Еден час не е многу време, но без Гугл веб мејлот може да изгледа како цела вечност, ако се има во предвид неговата распространетост - 350 милиони корисници ширум светот.

Гугл прво сметал дека со овој проблем се зафатени помалку од два проценти од корисниците, а потоа цифрата е зголемена на десет проценти.

Проблеми во работата на сервисот за електронска пошта веќе се случуваа, но овој проблем не е единствениот кој моментално ја погодува оваа компанија.

Гугл е „на мета“ на компанијата Оракл која веќе две години бара отштета од милијарда долари за користење на програмскиот јазик Java во изградувањето на оперативниот систем Android. Java е развиена кон почетокот на деведесетите години во компанија која Оракл во меѓувреме ја купи.