Жените во просек дневно поминуваат по 81 минута на Фејсбук, а колку подолго се вклучени на друштвената мрежа, толку се понесреќни и понезадоволни со својот живот...

Најпопуларната друштвена мрежа, Фејсбук, била предмет на бројни научни студии, тие покажале како позитивни така и негативни ефекти од прегледувањето на туѓите и уредувањето на сопствениот профил.

Депресија, промена на големината на мозокот и дебелина се некои од несаканите ефекти, последните истражувања на листата со негативности го додале и незадоволството со сопствениот живот, а тоа чувство е специфично само за женскиот пол.

Поточно, кога шведските научници од универзитетот во Гетеборг ги проучувале навиките при користење на Фејсбук на над илјада волонтери забележале не само дека жените дневно поминуваат повеќе време на социјалната мрежа од мажите, туку и дека колку повеќе ги разгледуваат туѓите профили толку се понесреќни и понезадоволни со своите животи.

Корисниците во просек во текот на денот се пријавуваат на Фејсбук по шест пати, а на многумина Фејсбук им е почетна страница на интернет прелистувачот. Жените во просек трошат 81 минута на Фејсбук, додека мажите во еден ден поминуваат 64 минути гледајќи ги туѓите објави.

Над половина од испитаниците изјавиле дека без Фејсбук им е многу тешко и скоро невозможно да останат во тек со случувањата во општеството. Студијата исто така покажала дека повеќето од волонтерите на Фејсбук објавуваат само големи вести, позитивни мисли и настани. Од друга страна, 38 отсто признале дека пишуваат само за негативни емоции и настани.