На Саемот за електроника за широка потрошувачка (CES) во Лас Вегас, кој е одржан од 10 до 13 јануари, навестено е дека Microsoft ќе го пласира својот Windows 8 во октомври 2012 година.

За време на кратката демо промоција на следната генерација Microsoft оперативен систем, Џанел Пул, директорка на PR секторот во WBG (Windows Business Group) рече дека во компанијата не зборувале за конретен датум на премиера, затоа што тоа обично не го прават.

„Ние размислуваме од еден до друг настан, а следната клучна точка за нас е промоцијата кон крајот на февруари на која на корисниците ќе им прикажеме најава за OS Windows. Од друга страна, еден од доверливите показатели може да биде тоа дека нов Windows излегува на секои три години, а бидејќи сега во октомври ќе бидат три години од лансирање на 7-ката, мислам дека тоа е добар упатник“, рече Пул.

Иако октомври и порано се споменуваше како месец за премиера, ова е најконкретно навестување до сега кое доаѓа од компанијата Microsoft.