Замислете да можете да сурфате на интернет и да ги читате статусите на своите пријатели на Фејсбук без да се помрднете.

Благодарение на новите технологии, сурфањето наскоро ќе се одвива и со помош на компјутеризирани контактни леќи. Пораки и фотографии на овој начин автоматски би се прикажувале пред вашите очи.

До сега технологијата за пренос на информации преку видното поле беше незамислива и ја гледавме можеби само во научно-фантастичните филмови. Но, научниците сега развија прототип контактни леќи кои еден ден би овозможиле цела палета hands-free информации.

Таквите леќи би се ставале и ваделе како вообичаените контактни леќи, а истражувачите тврдат дека сите компоненти се мали и сместени така што не му сметаат на видното поле. Професорот Бабак Парвиз во леќите вградил LED светло и антена која собира информации преку бежична мрежа и електронски круг.

Леќите се тестирани на зајаци и велат дека не им го оштетиле ниту видот ниту здравјето. Професорот Парвиз тврди дека еден ден луѓето ќе можат сите информации да ги примат преку контактни леќи. Прототипот на првата верзија даде изненадувачки резултати.