Англија | Самуел Ето му се извини на Џордан Хендерсон за опасниот старт, напаѓачот на Челзи исто така признава дека можеби заслужил да добие црвен картон...
Во разговор со The Sun, напаѓачот на ’Сините’ вели дека тој не е насилен играч и немал намера да го повреди противничкиот играч, но признава дека стартувал опасно и можеби требал да биде исклучен.
Самуел Ето исто така ја искористи оваа прилика за јавно да му се извини на Џордан Хендерсон.
„Можеби требаше да добијам црвен картон” – рече Ето.
„Но јас не сум судијата. Секој има право на свое мислење, сепак потребно е да ги почитуваме одлуките на арбитрите”.
„Во воведните минути од натпреварот, двете страни покажаа голема стрст, но луѓето знаат дека не сум насилен играч”.
„Навистина ми беше жал што го видов Џордан како се превртува на тревата, сакам да ја искористам оваа можност за да му се извинам”.
„Има денови кога некој лошо стартува врз мене, ова е фудбал и се случуваат вакви работи”.
„Но мојата намера беше да помогнам во одбраната и да спречам да примиме гол, ништо повеќе. Немав намера да повредам некого”.
Кон финишот на средбата, Самуел Ето беше инволвиран во уште еден контроверзен момент.
Камерунецот имаше дуел со Луис Суарез, по кој напаѓачот на Ливерпул падна во шеснаесетникот.
Жозе Мурињо го обвини Уругваецот дека се обидел драматично да одглуми пенал, додека пак Брендан Роџерс истакна дека судијата имал доволно елементи да покаже на белата точка.
„Судијата добро си ја заврши работата. Беше на два метри од нас” – продолжи Ето.
„Лесно им е на луѓето да зборуваат кога се далеку од случувањата. Да, постоеше контакт, но не направив прекршок”.
Извор: 24FUDBAL.com.mk
