Англија | Португалскиот репрезентативец, Нани стави потпис на нов договор и се обврза кон ’Црвените Ѓаволи’ до 30. јуни 2018...

Изминатово лето често се говореше дека Нани ќе замине од Олд Трафорд откако минатата сезона тој имаше ограничена минутажа и забележа само седум стартови во Премиер лигата.
 
Сепак, репрезентативецот на Португалија остана во Манчестер Јунајтед и вчера стави потпис на нов договор со кој се обврза кон ’Црвените Ѓаволи’ до 2018.
 
„Манчестер Јунајтед е задоволен што може да соопшти дека Нани стави потпис на нов петгодишен договор” – гласеше известувањето на шампионот на Англија.
 
И покрај тоа што Нани беше повреден во поголемиот дел од подготовките за новата сезона, Дејвид Мојс е импресиониран од она што го видел од 26 годишниот Португалец.
 
„Задоволен сум што Нани стави потпис на нов договор” – рече менаџерот на Манчестер Јунајтед.
 
„Се работи за квалитетен играч со огромно искуство, и покрај тоа што има само 26 години”,
 
„Бев импресиониран од неговиот пристап на тренинзите, па со нетрпение чекам да соработувам со него во следните сезони”.
 
За новиот договор, Нани рече: „Играњето за Манчестер Јунајтед е фантастично искуство за мене”.
 
„Тренирањето со топ играчи, кој сакаат да освојуваат трофеи секоја година е голема мотивација за мене”.
 
„Среќен сум што новиот менаџер ми укажа доверба, па сега целта е да му помогнам на тимот да забележи успех оваа сезона”.

Извор: 24FUDBAL.com.mk