Мајкл Овен и официјално е нов фудбалер на Манчестер Јунајтед откако вечерва и официјално го стави потписот на две-годишен договор со Црвените Ѓаволи.

Мајкл Овен како слободен фудбалер се сели во Манчестер Јунајтед откако неговиот договор со Њукасл заврши во јуни.

Неколку екипи беа заинтересирани за Овен, но Манчестер Јунајтед успеа да победи во трката за славниот англиски напаѓач.

29-годишниот фудбалер и официјално потпиша за Манчестер Јунајтед откако неколку часа претходно успешно ги помина медицинските прегледи.

"Мајкл Овен е напаѓач од светска класа со докажани голгетерски способности на највисоко ниво и тоа никогаш не било во прашање" - изјави Сер Алекс Фергусон за официјалната страна на Јунајтед.

Мајкл Овен вели дека без размислување ја прифатил понудата од Сер Алекс Фергусон.

"Јас штотуку бев на почетокот на преговори со други клубови кога Сер Алекс Фергусон ми се јави на телефон во средата попладне, ме покани на доручек со него следното утро и ми кажа дека ме посакува. Јас прифатив без размислување" - изјави Мајкл Овен.

"Ова е фантастична шанса за мене и ја прифатив со двете раце".

"Сега оптимистички гледам кон мојата иднина во Манчестер Јунајтед и среќен сум бидејќи веќе знам поголем дел од фудбалерите тука".

"Сакам да му се заблагодарам на Сер Алекс за довербата која ја има во мене и му ветувам дека ќе му се оддолжам со голови и добри игри" - заврши Мајкл Овен.

Powered by: 24 FUDBAL.com.mk