Данскиот режисер е прогласен за "персона нон грата" на Фестивалот во Кан, поради коментарите за Хитлер и нацистите...

Ларс фон Триeр на прес-конференцијата за новинари рекол дека може да се спореди со Адолф Хитлер.

"Навистина сакав да бидам евреин, но сватив дека всушност сум нацист. Го разбирам човекот. Тој не е дефиниција на добар човек, но разбирам многу за него и некако се соживувам со него. Но, јас не ја поддржувам Втората светска војна, ниту имам нешто против Евреите. Целосно ги поддржувам Евреите, добро, не баш целосно, Израел знае да биде напорен, но...Како сега да се извлечам од оваа реченица", рекол тој.

Организаторите соопштиле дека фамозниот режисер и добитник на Златна палма во 2000 година за филмот "Танц во мракот" повеќе не е добредојден во Кан.

"Остро ги осудуваме коментарите на Фон Триeр и го прогласуваме за персона нон грата на Фестивалот", се наведува во соопштението.

Организаторите навеле дека данскиот режисер "веднаш се извинил" без да посочи на кого и на кој начин, но тоа не ја променило нивната одлука. Неговиот филм "Меланхонија" ќе остане во конкурсната програма.