Уредништвото на музичкото списание „Билборд“ ја прогласи американската поп пејачка Кети Пери за Жена на годината.

Уредникот на популарното списание, Бил Верде, вели дека Кети Пери (27) е избрана поради својот допринос во музиката, нарекувајќи ја „една од највозбудливите и најинспиративните уметнички во оваа индустрија“.

„Кети зачекори во музичката индустрија пред само пет години и веќе постигна повеќе отколку што многу уметници се надеваат дека ќе остварат за време на целата своја кариера.“

Пејачката во последните 12 месеци помина низ бурен период за време на разводот од британскиот комичар Расел Бренд, чие искуство го преточи во хит синглот Part Of Me и филмот Katy Perry: Part Of Me 3D во кој зборува за подемите и падовите во својот приватен живот и кариерата.

На листата на Форбс за најплатени женски изведувачи која е објавена во декември 2011 година, Кети Пери го зазема третото место од 44 милиони долари, а само во Америка има продадено 48 милиони синглови, меѓу кои се најзините најголеми хитови Firework, California Gurls, Е.Т. и Hot N COld.

Покрај тоа, Кети е и многу успешна бизнис-жена. Ширум светот се продаваат парфеми, лакови за нокти, вештачки трепки со нејзиното име, а стана и заштитно лице на една линија козметички производи и грицкалки. Меѓу претходните добитнички на оваа ласкаво признание се и Тејлор Свифт, Бијонсе и Ферги од The Black Eyed Peas.

На Кети Пери оваа награда свечено ќе и биде доделена на 30 ноември во Њујорк.