Понекогаш парите можат да купат се!

Руски богаташ кон средината на август ќе потроши 1,5 милиони евра за прославата на својот роденден на италијанскиот остров Сардинија, каде што резервирал плажа за луксузна вечера и ексклузивен концерт на Стинг, објави весникот “Unione Sarda”.

Според весникот кој не го објави името на рускиот бизнисмен, само концертот на Стинг ќе чини 400 илјади евра.

За изнајмување на плажата, Русинот кој престојува како турист, на општинската фирма којашто управува со летувалиштето “Билионер бич” во Капричиоли, ќе и плати уште 30 илјади евра.

На плажата ќе бидат поставени голем шатор од 25 метри и вештачки фонтани, шампањот ќе тече во реки, а на менито ќе има кавијар и јастози. Поканети се 200 гости на роденденската прослава којашто ќе се одржи на 18-ти август, гостите веќе почнале да пристигнуваат со луксузни јахти и приватни авиони во соседните места.