Холивудскиот актер Џорџ Клуни во петокот беше уапсен поради граѓанска непослушност во текот на протестот пред суданската амбасада во Вашингтон. Тој своето прекршочно дело сакал да му го префрли на Бред Пит...

Извршниот директор на организацијата “Jewish World Watch”, Фред Кругер, кој исто така беше уапсен на истиот протест и заедно со Џорџ Клуни ја делел ќелијата, изјави дека славниот актер ја задржал својата позната смисла за хумор и во неколкуте часа минати во затвор.

„Правеше сите да се чувствуваме опуштено, нé забавуваше цело време. Кога припадниците на тајните служби нé прашуваа за имињата, тој се обиде да ги убеди дека е Бред Пит", вели Кругер.

Од друга страна, Кругер, вели дека и покрај шегите, Клуни е многу сериозен кога станува збор за хуманитарната криза во Судан. „Неговото познавање на тамошната ситуација е огромно", додава Кругер.

Клуни и другите учесници на протестот беа пуштени од затвор по само неколку часа, откако платија глоба од по сто долари.