Полскиот претседател Лех Качињски и неговата сопруга Марија ќе бидат погребани во неделата, објави претседателската администрација, седмица по авионската несреќа во Русија, во која освен нив загинаа уште 94 лица.

"Меморијалната служба е предвидена за сабота, а погребот на претседателската двојка ќе се одржи во неделата", изјави заменик. началникот на канцеларијата на полскиот претседател Јацек Сасин за полското радио.

"Местото каде што претседателската двојка ќе биде закопана, веќе беше избрано од семејството, но не може да биде објавено во моментов", додаде Сасин.

Телото на сопругата на полскиот претседател - Марија Качињска, е испратено за Полска од московскиот аеродром "Домодедово" денес изутрина, изјави портпаролот на аеродромот. "Авионот полета рано утринава", изјавил портпаролот.

Качињски и неговата сопруга загинаа во несреќа во саботата, кога претседателскиот авион се урна во близина на западниот руски град Смоленск, при инцидентот загинаа сите 96 лица во авионот.