Семејството Логар од словенското село Подврв не сака да го предаде мечето, кое случајно залутало на нивниот имот, на владините службеници кои планираат да го затворат...

Мечето Среќко многу им прираснало за срце на членовите од словенското семејство Логар, и иако пред неколку дена на новинарите им рекоа дека не можат сами да се грижат за него, сега градат живеалиште за него недалку од семејсната куќа. Сигурни се дека меченцето во азил не би ја добило потребната нега и дека за три месеци би го усмртиле.

Семејството за новото милениче подготвува живеалиште кое ќе се протега на 900 метри квадратни, што е повеќе простор отколку што е според прописот на законот. Но, од словенскиот државен инспекторат издадоа решение за одземање на мечето, а одлуката требаше да влезе на 12 мај. Семејството Логар тврди дека решението никогаш не стигнало на нивна адреса.

„Ако добиеме решение од инспекторатот, ќе се жалиме“, рече Матевж Логар и нагласи дека не го спречуваат движењето на животното кое, ако сака, секој момент може да се врати во шумата. Среќќно, кој пред 30 дена залутал на имотот на семејството Логар, најверојатно бил напуштен од мајка си.

Очигледно е дека ужива во својот нов дом. Безгрижно си игра во дворот, се качува по дрвјата, трча со кучето и се излежува на каучот во дневната соба. Популарност стекна и на фејсбук каде што веќе има 550 фанови.