Италијански истражувачи веруваат дека го откриле местото на кое почива дамата од славната слика на Леонардо Да Винчи...

Според лондонскиот "Телеграф", експертите, по две недели истражување со помош на георадар и стари мапи и документи, пронашле гробница во еден напуштен манастир.

Потрагата за гробот на Лиза Герардини Дел Џокондо, за која е верува дека е мистериозната жена која пред 500 години му позирала на славниот италијански мајстор, ја предводи контроверзниот професор, новинар и писател Силвано Винчети.

Гробот е пронајден во подот на манастирот на Санта Орсол во Фиренца, откако од него бил отстранет бетонски слој за покривање на старите тули.

"Пронајдовме не една туку две гробници и убедени сме дека во едната се наоѓаат посмртните останки од Мона Лиза", рекол професорот Винчети, додавајќи дека археолозите ќе мораат да поработат уште неколку дена пред да допрат до гробот и да го отворат.

Работата ја следи и Наталија Гучардини Строци, потомок на Мона Лиза, која во почетокот се спротиставила на истражувањето, верувајќи дека нејзината прабаба има право да "почива во мир". Таа меѓутоа, го променила мислењето по средбата со Винчети и неговиот тим.

"Во почетокот помислата на ископувањето ме преплашуваше, но сега сум фасцинирана и сакам да дознаам дали ова е местото каде што се наоѓа една од моите предци", објаснила таа.