Бројни славни обожаватели на починатата Елизабет Тејлор реагираа на веста за нејзината смрт, па преку Твитер го изразија своето жалење поради заминувањето на филмската дива...

„Елизабет Тејлор беше човек во вистинска смисла на зборот. Беше храбра, нежна и великодушна“, така напиша Џејн Фонда, која прва реагираше на смртта на нејзината пријателка, а во изразите на жалење поради заминувањето на филмската дива и се придружија многу други познати лица.

„Многу тажен ден. Елизабет Тејлор беше последната холивудска легенда, и страшно шармантна жена. Таа беше единствената личност која имаше виолетови очи, прекрасно. Освен тоа, направи голема работа кога во последните 25 години им помагаше на заразените со ХИВ. Многу сум горд што ја познавав, па дури и површно“, напиша музичарот Џорџ Мајкл, а му се придружи и Елтон Џон.

„Изгубивме голема холивудска дива, но што е уште поважно, изгубивме едно неверојатно човечко суштество“, напиша Елтон Џон.

Лери Кинг исто така го изрази своето жалење преку Твитер: „Елизабет Тејлор беше голема пријателка и вистинска ѕвезда. Беше многу посебна. Таква нема да се повтори“, напиша тој.

„Ја сретнав Елизабет неколку пати во животот. Беше една многу среќна личност, со исклучителна смисла за хумор. Сакаше да се смее“, напиша на Твитер Стив Мартин, додека Џоан Риверс се присети на напорите кои Елизабет ги вложувала во борбата против СИДА.

„Многу сум тажна поради смртта на Елизабет Тејлор. Таа беше првата ѕвезда која се посвети на борбата против СИДА, додека уште не беше толку популарно“, напишала Риверс, а Меџик Џонсон го постирал следното: „Елизабет, фала ти за се што стори за борбата против ХИВ и СИДА. На сите ќе ни недостигаш!“