Што ако Лејди Ди ја лажирала својата смрт и живее под лажно име во мало американско градче? Прашање на кое одговорот го даде Моника Али...

Под наслов Untold Story (Нераскажана приказна), Моника Али напишала роман базиран на претпоставката што би се случило ако принцезата Дијана не умреше во фаталната автомобилска несреќа во Париз во август 1997 година, дека ја лажирала својата смрт и дека на друго место започнала нов живот.

Во комеморативниот говор за својата покојна сестра Дијана, грофот Спенсер изјави дека била најпрогонуваната личност во современата историја. Затоа не е чудно што Дијана често сонувала да побегне од својот живот. Сонувала да се пресели во странство, затоа што верувала дека бегството ќе и овозможи нормален живот.

Тоа било и основата за романот Untold Story.

„Мојата принцеза е фикционален лик, базиран на принцезата Дијана. Таа ја исполнува својата фантазија и последните десетина години живее во мало градче во Америка, каде во списанијата бара фотографии од Лондон за да почувствува малку од стариот живот.

Наидува на статија за концертот кој нејзините синови го организирале во Хајд Парк во чест на десет години од нејзината смрт. Кршливиот мир постојано и е нарушен со потсетници за тоа што го изгубила - не гламурот на кралството, туку сопствените деца. Лидија, насловната хероина од романот има многу заеднички точки со Дијана. Ја обожавале милиони, во емотивниот живот доживеала одбивање, скршено срце и предавство“, изјави Моника Али за Daily Mail.