Шпанка тврди дека станала законска сопстваничка на сонцето, откако го регистрирала како своја сопственост кај локален нотар и сега планира да им наплаќа на луѓето што ја користат неговата енергија...

49-годишната Анхела Дуран од градот Виго, област Галиција, поднесе барање за сопственост на огнената ѕвезда, која се наоѓа во центарот на нашиот сончев систем, откако разбрала дека американец поднел слично барање за месечината, Марс и Венера.

Иако Договорот за вселената од 1967 година и забранува на владите да тврдат сопственост врз небесните тела, тоа не се однесува и на приватни лица.

Нотарот на шпанката се повикува на оваа опција, откако се консултирал со правните власти во Шпанија.

Минатата седмица Анхела Дуран добила документ кој предвидува дека таа е "сопственик на сонцето, ѕвезда од спектар тип G2, која се наоѓа во центарот на сончевиот систем, на средно растојание од Земјата од околу 149 600 000 километри".

"Го познавам Законот и обезбедив законска подлога на моето барање. Секој би можел да го направи истото, само што јас прва се сетив", рекла Дуран.

Таа објави дека планира да го искористи својот имот и дека ќе им наплаќа на луѓето кои ја користат неговата енергија.

Жената се сретнала со претставници од шпанското Министерство за индустрија, за да разговара со нив за воведување на такса.

Таа објаснила дека нема ништо чудно во тоа бидејќи, хидроцентралите го собираат профитот од енергијата што се добива од реките, а таа енергија им припаѓа на сите.

Анхела Дуран исто така направила и прераспределба на парите: 50% ќе одат за Владата, 20% на националниот пензински фонд, 10% за борбата против гладот во светот, 10% за научни истражувања, а останатите 10% ќе ги задржи за себе.