Израелските власти и Google на интернет ќе ги постават 2000 години старите Кумрански ракописи...

Еврејските библиски текстови, кои се сметаат за едно од најголемите археолошки откритија во минатиот век, ќе бидат достапни бесплатно, како фотографија со висока резолуција, од кои првите ќе се појават на интернет во наредните неколку месеци.

Текстовите ќе бидат достапни на оригинален јазик и како преведен текст. Пнина Шор од израелската катедра за антиквитети, изјави дека на овој начин оригиналните ракописи ќе бидат сочувани, но исто така ќе бидат на располагање за пошироката јавност. Експертите долго време го критикувале фактот што само малкумина луѓе имаат пристап до свитоците пронајдени во 1947 година во пештера во близина на Мртвото Море.

Кумранските ракописи се важни како потврда за автентичноста на Светото Писмо. Во 11 пештери биле пронајдени околу 380 текстови, од што 100 библиски. Свитоците биле од папирус и кожа, завиткани во ленено платно, а потоа сместени во тегли од глина. Се претпоставува дека тие настанале во периодот од 163 година пред новата ера до 233 година од новата ера. Повеќето од текстовите се на хебрејски јазик, а мал е бројот на арамејски јазик.