Семејството на лидерот на терористичката организација "Ал Каеда" Осама бин Ладен ја изнајмува неговата луксузна вила во луксузната населба Бел Ер во Лос Анџелес за снимање на порнографски филмови.

Тоа го објави американскиот таблоид "Дејли стар". Сопственик на вилата во медитерански стил со вредност од 26 милиони американски долари, која има девет спални и десет бањи, е поголемиот брат на терористот број еден, Ибрахим Мохамед бин Ладен.

Ибрахим и неговото семејство избегаа од САД по нападите на 11 септември, но имотот им остана и очигледно продолжува да им носи големи приходи.

Од организацијата Film LA, која ги регистрира сите дозволи за снимање во областа на Лос Анџелес, потврдиле дека најмалку пет хард-порно филмови биле снимени во вилата од страна на компанијата за производство на филмови за возрасни Wicked Pictures.

Портпаролот на порностудиото одбил да каже колку изнесува сумата кој тие ја плаќаат на семејството Бин Ладен за наем на имотот. Извор од компанијата, сепак, рекол дека "не би било необично да се плаќа помеѓу 5 и 10 илјади американски долари дневно за место како ова".