Разновидни слатки безалкохолни пијалоци, а особено газираните се во "црната листа" на сите упатства за здрава исхрана. Едно истражување, сепак покажува дека пред донесувањето на важни одлуки во животот потребно е да се напиете некој прилично благ сок за да ви се избистри главата.

Американските научници препорачуваат, вработените луѓе кои планираат да побараат зголемување на платата претходно да се напијат сок или нешто газирано.

Истражувањето спроведена од страна на научниците од Универзитетот во Јужна Дакота покажало дека малку зголеменото ниво на шеќер во крвта помага во донесувањето на мудри одлуки, додека недостатокот на гликоза доведува до импулсивни одлуки.

Во анкетата учествувале 65 студенти на кои научниците им поставиле прашање на кое тие треба да одговорат, дали да земат одредена сума пари наутро или да се решат за поголема сума но подоцна. Половина од учесниците одговориле на гладен стомак, а другата половина откако испиле засладен газиран пијалок.

"Десет минути откако го испиле слаткиот пијалок учесниците побрзо се решавале за повисока сума, која ќе ја добијат подоцна", објаснува Сао Тјан Ванг, еден од психолозите кои го спровеле истражувањето.

"Тоа е како кај исхраната, ако имате зголемено ниво на шеќер во крвта може подолго да чекате до следното јадење", вели научникот.

Тој прецизира дека истражувањето е спроведено со цел да се разбере дали нивото на шеќерот во крвта ги регулира, не само навиките за исхрана, туку и донесувањето на важни одлуки.