Почетната страна на глобалниот интернет пребарувач, Google, денес ја одбележува Ноќта на вештерките...



Ноќта на вештерките се одбележува вечерта на 31 октомври, и после полноќ на 1 ноември, што кај некои христијани се совпаѓа со одбележување на Денот на мртвите, т.е. на сите светци.

Како што се верува, овој обичај потекнува од древните келтски народни традиции со паганско потекло.

Во енциклопедијата "Британика" пишува дека постојат две главни карактеристики на друидскиот празник, "палење на логорски оган и верување дека духовите и вештерките ќе талкаат наоколу таа ноќ".

Според наводите на оваа енциклопедија, „друидските церемонии додале некои обележја од римскиот фестивал, кој се одржал околу 1 ноември во чест на Помона, каде оревите и јаболката играат важна улога, претставувајќи зимска залиха на овошје".



Многу подоцна Ноќта на вештерките почнала да се одбележува не само во Ирска и Шкотска, туку и во САД, Канада, Порторико, Австралија, Нов Зеланд и се почесто во одредени европски земји.

По повод одбележување на овој датум, во Њујорк е изложена најголемата тиква во светот, тешка 922 килограми.

Гигантската тиква, која била донесена од долината на Напа во Калифорнија, е главна атракција на "проклетиот парк" во њујоршката ботаничка градина по повод празникот.