Колку пати родителите ви кажувале: "Молчи и јади"? Доколку таа наредба во детството ви била одвратна, тогаш ресторанот "Grееnpoint" во Бруклин, не е за вас...

Ресторанот за органска храна "Grееnpoint" во Њујорк во Бруклин, не е единствен само по јадењето кое го служи, туку и по тоа што зборувањето на маса е забрането.

Всушност, тишината е задолжителна само во недела навечер неколку пати месечно, а останатите денови гостите можат да зборуваат колку што сакаат.

Главниот кувар вели дека идејата да им забранат на гостите да зборуваат, дошла откако престојувал во будистички манастир во Индија, каде се практикува "тивок доручек".

"Сакаме нашите гости да се фокусираат на храната, на вкусот. Реакциите на посетителите се различни - за едни тоа е романтично, за други мачно затоа што едвај се воздржуваат од коментари за храната и разговорите на кои навикнале во текот на оброкот", вели куварот Николас Науман.

Гостите смеат да зборуваат само кога нарачуваат храна, а потоа во ресторанот може да се слушне само тропањето на лажиците, ножевите...ставањето вода...Некои излегуваат надвор дури и ако само мора да кивнат или да се искашлат.