Речиси 300 000 "обиди за влез во сајтови кои се сметаат за порнографски", биле регистрирани помеѓу мај 2012 и јули 2013 година од компјутери на британскиот Парламент, покажуваат официјалните податоци...

Тие беа објавени од страна на парламентот како одговор на барање од електронското издание на британскиот весник "Хафингтон Пост". Според официјалните податоци најголем број врски се регистрирани во ноември минатата година со 114 844 обиди за влез во порнографски сајтови и во април 2013 година со 55 552 обиди.

Обидите се намалуваат драстично до 15 април 2013 година и 397 во јуни 2013 година. Запрашана од "Хафингтон Пост", портпаролката на парламентот не даде објаснување за варијациите во бројот на линкови. Според изданието, кое потсетува дека 5.000 лица работат во парламентот, за седум месеци од јануари до јули 2013 година биле регистрирани и 52 000 посети од парламентарната мрежа на сајтови за вонбрачни врски.

"Не сметаме дека овие податоци даваат точна слика за бројот на намерни обиди, имајќи го во предвид разновидниот начин на кој сајтовите функционираат, реагираат и општат", изјави портпаролката на Законодавниот дом. "Еден корисник може да влезе во сајт кој содржи опционални или автоматски линкови до други сајтови (без да ги отвора), што сепак се регистрира како пребарување", додаде портпаролката.