Времето на летување се приближува, а со него и грижата за трошоците кои ги подразбира патувањето. За последниот ден од одморот да не бркате по паричниците и џебовите, погледнете неколку корисни совети кои ќе ви помогнат да заштедите и додека сте на летување...

Ако немате зацртано одредена дестинација, доста пари можете да заштедите со одење на место со поефтини хотели, такси, храна.

Повеќето дестинации се поефтини надвор од сезоната, а некои туристички понуди одреден период од годината можат да бидат посебно погодни.

Евтините авионски карти често можат да се добијат на ноќни или рани утрински летови. Сепак, на летување не морате да патувате ниту со авион ниту со автомобил. Распрашајте се, до многу дестинации е поевтино да се стаса со воз.

Кога ќе стигнете до саканата дестинација користете јавен превоз, затоа што изнајмувањето автомобил или возење со такси обично е доста скапо.

Немојте да активирате роаминг. За меѓународни повици секогаш можете да го користите хотелскиот телефон, што е доста евтина опција. Задолжително распрашајте се дали хотелот во кој одите има интернет, па наместо телефонот можете да користите Скајп, на пример.

Потрудете се да резервирате хотел кој во собата има кујна, па купувајте намирници во локалните продавници и сами подгответе си храна. Водата купувајте ја во големи пакувања, наместо во мали шишиња.