Мирисните „пакетчиња“ на кои не може да им се одолее многу бргу стануваат мали луѓе, а карактеристиките на личноста во каква ќе се развие бебето избиваат на виделина со сите нијанси и особености кои ќе се развијат во текот на животот. Каков тип на личност е вашето бебе?

Шармер - Бебе кое не престанува да се смешка, што е слика од која се „топат“ и целосно непознати поминувачи на улицата... Извор на бескрајна енергија е за секој кој ќе го погледне овој тип на бебе.

Срамежливко - Поголемиот број бебиња имаат „напади“ на срамежливост од време на време, но бебето кое во главно е срамежливо, ќе им се насмевнува само на избрани (тато, мама, баба, дедо, бато или дада) во негова близина. Срамежливите бебиња уживаат кога ги носат во рацете само возрасните кои ги сакаат и добро ги познаваат и со кои се чувствуваат заштитено.

Чувствително бебе - Чувствителните бебиња лесно ја впиваат енергијата од својата околина и веднаш реагираат на гласни звуци, дури и ако не допираат од непосредна близина, изненадувања и промени на вообичаениот дневен ритам. Чувствителните бебиња копнеат по стабилност и почитување во текот на денот.

Набљудувач - Овие бебиња го впиваат светот околу себе со такво внимание и интересирање, што кога ќе се концентрираат на нешто што во тој момент им го привлекло вниманието, остатокот од светот исчезнува. Ним обично не им се потребни многу играчки, затоа што светот и луѓето околу нив се извор за совршена забава.

Опуштено бебе - Ова е бебе кое родителите и роднините го опишуваат како „убаво и мирно“. Не гуга, задоволно е во речиси секоја положба и ситуација, дури и ако околностите не се идеални.

Бебе со барања - Овие бебиња бараат внимание во секој момент кои го поминуваат во будна состојба, поради што понекогаш првите месеци можат да бидат тешки за родителите. Но, ваквите деца често пораснуваат во брилијантни умови, талентирани се на многу полиња со изразена способност за ефикасно решавање на проблеми.