Полицијата во источниот индиски град Калкута ја користи сликата од корицата на познатиот албум на Битлси 'Abbey Road' во кампања за безбедност на патиштата...

Сликата ги покажува членовите на групата, додека поминуваат на пешачката патека на 'Abbey Road' во северен Лондон. Слоганот на кампањата е "Ако тие можат, зошто да не можеш и ти?".

Фотографијата за прочуената корица е дело на Иан Макмилан и е направена во 1969 година. Пешачката патека се наоѓа пред студиото 'Abbey Road', каде групата снимаше голем дел од својата музика.

Сообраќајните полицајци во Калкута залепиле над 40 плакати со сликата на Битлси во рамките на кампањата за да ги убедат луѓето да ги користат пешачките патеки.

"Сакавме провокативна и пријатна кампања и ни текна идејата да ги искористиме Битлси и да ја искористиме нивната светска слава. Сакаме да кажеме дека штом Џон, Пол, Џорџ и Ринго можат да користат пешачка патека, другите луѓе, исто така можат да го сторат тоа", изјави патниот полицаец Супратим Саркар.

"Ќе кажеме по неколку месеци дали кампањата вродила со плод", додаде тој.