Доделувањето на Оскарите е закажано за 24 февруари. Се гланцаат статуетките, се шијат фустаните, но и се меси, се вари, се пече... за така наречениот Гувернеров бал кој традиционално се одржува по церемонијата на доделување.

Кога ќе се заврши официјалната церемонија на доделување во Кодак театарот во Лос Анџелес, добитниците на Оскар, но и номинираните и останатите избрани гости, вкупно 1.500, ги очекува така наречениот Гувернеров бал и разни вкусни деликатеси.

Што подготвиле овој пат познатиот кувар Волфганг Пак и неговите 300 кувари? Повеќе од 50 различни јадења!

Актерките кои биле на макотрпни диети за опуштено да се перчат на црвениот тепих, сега ќе можат да навалат на неколку различни салати: од зелка, цвекло, јапонска бресква, артичок, целер и ореви... на разна риба: чаден јастог, филети туна... на пилешка пита, тартуфи, но и неколку видови италијанска пица.

Но, на крај, она по што Волфганг Пак е познат, кој веќе 18 години ги „храни“ оскаровците, чоколадни фигури Оскар полиени со златен прав.

И сето тоа ќе го служат 650 келнери.