На девојчињата во тинејџерска возраст другарките имаат посилно влијание од телевизијата или списанијата.

Иако во последно време често се зборува за погубното влијание на медиумите врз децата, извор на најсилно влијание и притисок врз тинејџерките се - нивните другарки, покажало истражување кое неодамна е спроведено во Америка.

Во истражувањето целта била да се утврди дали посилно влијание врз младите имаат медиумите или врсниците. Во истото учествувале 237 девојчиња на возраст меѓу 10 и 17 години, а психолозите следеле колкаво е нивното задоволство со животот и дали страдаат од некое пореметување во исхраната. Одговарале на прашања во врска со зачестеноста на користењето на социјалните мрежи, а требало да се изјаснат и како се доживуваат самите во однос на врсничките, кога станува збор за физичкиот изглед.

Излегло дека девојчињата кои не се задоволни со својот изглед тоа не ги мачи поради фотките од манекенки со кои медиумите ги „бомбардираат“, туку поради ставот на врсниците.

„Најголемо влијание на формирањето на сликата за сопственото тело во тинејџерската возраст имаат врсниците од опкружувањето, а не медиумите. Освен тоа, на голем притисок децата се изложени и на социјалните мрежи, на кои се ‘борат’ за внимание, што само ја поттикнува конкуренцијата меѓу врсниците“, вели д-р Кристофер Фергусон од Универзитетот во Тексас кој бил шеф на истражувачкиот тим.