Универзитетот во Шкотска нуди предмет кој се занимава со изучување на „вонземјанскиот живот“.

Универзитетот во Единбург во рамки на студиите за природни науки нуди курс за „астробиологија и потрага по вонземски живот“. Пријави пристигаат од цела Европа, но и Канада, Америка и Кина.

„Запрепастени сме од огромното интересирање кое го предизвикаа овие предавања. Секојдневно добиваме нови пријави, а често воопшто не станува збор за наши студенти, туку деца од средно училиште, па дури и пензионери кои се интересираат за вонземјанци“, вели професорот по астробиологија Чарлс Кокел.

Тој објаснил дека курсот опфаќа историја за настанување на животот на Земјата, и споредна анализа на планетите на кои, технички, би можело на сличен начин да се развиваат некои облици на живот.

„Горди сме што овој курс привлече толкаво внимание, и што можеме да се пофалиме со ученици од цел свет“, рече тој и додаде дека курсот сега постои и во дописна форма, поради огромно интересирање на луѓе кои не живеат во Шкотска.