Иако веќе 30 години е официјално во пензија, Британецот Џим Клементс (100) и понатаму работи и не сака да престане.

Наместо веќе три децении да ужива во пензионерските денови, тој грижливо работи во фирмата за продажба на алармни системи во Есекс, до душа само два пати неделно, но работи и не размислува да престане со додека може да оди... Колегите за него велат дека со задоволство им помага на другите, но и дека сака да флертува.

„Ја средувам папирологијата, копирам, се јавувам на телефон и на дамите секогаш им варам чај. Работата допринесува да се чувствувам посилно и помладо“, вели Џим.

Овој стогодишник, кој пред 19 години останал вдовец, се уште се занимава со спорт, а кога не е на работа оди на риболов или се грижи за својата градина во која со години одгледува зеленчук.

„Џим е неверојатен. Се уште работи два пати неделно. Сите кои прв пат работат со него не можат да веруваат дека има 100 години“, изјави еден негов колег.

Овој неверојатен старец има две деца, четири внуци и едно правнуче, а покојната сопруга ја запознал за време на Втората светска војна во работилницата на британската воена морнарица.