Дали и вие спаѓате во оние кои прво го фотографираат својот оброк, па дури потоа навалуваат на она што го нарачале во ресторанот? Во Њујорк се обидуваат да го спречат тоа.

Некои ресторани во Њујорк почнале да им забрануваат на гостите да ја фотографираат својата храна пред да ја изедат. Велат дека со тоа сакаат да ја зачуваат интимата и мирот на другите гости кои дошле во ресторанот да уживаат, а не да се плашат дали ќе завршат на некоја од популарните социјални мрежи.

Втора причина е тоа што блицот при фотографирањето може да го деконцентрира куварот кој ја подготвува храната, велат во некои ресторани на Менхетн, кои вовеле забрана за фотографирање на храната.

До оваа забрана дошло по „поплавата“ од фотографии со јадења од рестораните на популарниот Instagram. Тој нов тренд, наречен foodstagramming, го „тресе“ цел свет, не само Америка.

Сајтот Mashable.com пишува дека во 2011 година најчесто сме фотографирале колачи, торти и останати слатки работи (18,3%), потоа јадења од зеленчук (17,8%), а најмалку тестенини и пици (7,1%).

Сајтот исто така пишува, дека 25% од гастрономите ја фотографираат храната и ја споделуваат фотката преку социјалните мрежи без некоја одредена причина - само да покажат што денеска имале на менито.