Понекогаш пофалбите упатени кон детето можат да предизвикаат повеќе штета отколку корист. Изговарајќи фрази како „баш си паметен“ или „ти си вистински уметник“ всушност ја нарушуваат детската самодоверба.

Децата треба да се пофалат кога ќе направат нешто убаво, но ако користите фрази како „прекрасно, душо“, ќе ја нарушите нивната самодоверба, предупредуваат психолозите.

Коментарите како „многу си паметен“ или „ти си вистински уметник“, кои всушност не значат ништо, лошо ќе се одразат на развојот и самодовербата на детето, а подоцна можат да пречат и на нивниот успех во училиште, вели психологот Стивен Грос.

„Тие одредени пофалби лошо влијаат на децата во иста мерка како и неоправданите критики“, вели тој.

Наместо тоа, секогаш е подобро да го пофалите детето поради трудот кој го вложил во нешто.

Тоа го потврдуваат и научните истражувања. За време на еден експеримент спроведен на Универзитетот Колумбија, 128 деца на возраст од 10 и 11 години решавале многу задачи од математика. На едната група истражувачите по завршувањето на задачите им кажувале „убаво сте го направиле ова, многу сте паметни“, а на другата „тоа навистина добро сте го сработиле, мора многу да сте се потрудиле“.

На децата потоа им се дадени нови задачи, покомплицирани од оние кои ги решавале првиот пат, а кога научниците ги анализирале резултатите, излегло дека многу подобро ги решиле децата од втората група, чиј вложен труд порано бил пофален.

Родителите би требало да имаат предвид дека многу подобар ефект имаат пофалбите кои укажуваат на личноста на детето, а не просто „пофалба заради пофалба“. Ако често ги фалите децата за да ги компензирате критиките на кои сами сте биле изложени во детството, не им правите добро.

„Детската самодоверба се гради нежно и претпазливо. Слушајте што ви зборуваат децата, што ги интересира и кон што чувствуваат страст и нема да погрешите“, советува Грос.