Дека човечкиот интерес за истражување на Марс и понатаму е актуелен, докажува и натпреварот кој е организиран од страна на една холандиска компанија. Имено, на натпреварот за лет на Марс во 2023 година компанијата на "Mars One", се пријавиле повеќе од 1000 луѓе...

Од компанијата со седиште во Амерсфорт порачале дека воено искуство, обученост за пилотирање или факултетска диплома не се неопходни предуслови. Наместо тоа, поважно е кандидатите да бидат интелигентни, со добро ментално и физичко здравје и подготвени да посветат 8 години од животот на обука пред летот на црвената планета.

"Било какво официјално образование или искуство може да биде од корист, но сите вештини кои на луѓето ќе им бидат потребни на Марс ќе бидат совладани преку обука. Бараме луѓе подготвени за изградба и одржување на здрави односи, оние со длабока свест за експедитивност кои се стабилни и подготвени да имаат доверба во другите луѓе", рекла Сузан Флинкенфлогел, директорка на одделот за комуникација на компанијата "Mars One".

Исто така, потенцијалните кандидати за астронаути би требало внимателно да го прочитаат текстот за натпреварот напишан со ситни букви, затоа што во него се нагласуваат некои од најважните работи кои мора да се знаат - секој кој ќе ја помине програмата и обуката ќе одлета на Марс, и таму ќе остане до крајот на животот.