Љубезните деца се посреќни и попопуларни меѓу своите врсници, се резултатите од најновото истражување. Исто така, мало, едноставно добро дело, би можело да допринесе за намалување на насилството меѓу учениците.

Според истражувањето на Универзитетот Калифорнија, врската меѓу љубезноста и просоцијално социјално однесување, како што е правењето на некое добро дело, оди во двата правци - не само што среќните луѓе почесто прават добро за другите, туку и просоцијалното однесување во луѓето буди смисла и чувство за добро.

Научниците го спровеле првиот долгорочен експеримент, анализирајќи ја љубезноста кај децата. Со експериментот се опфатени повеќе од 400 деца на возраст од девет до дванаесет години кои одат во основно училиште во Ванкувер.

Учениците биле поделени во две групи - едната група имала за задача да се присетува на убави места кои ги посетиле, како што се игралишта, паркови, трговски центри.... а од другата група се барало да направат добро дело, како што е делење на ужинка во училиштетот или давање на поддршка на мајките по стресен ден на работа.

„Им дадовме на децата примери за добри дела, но нив им препуштивме да одлучат што е тоа добро дело“, кажа Кимберли Сонтер-Рајс, психолог од Универзитетот Британска Колумбија во Ванкувер.

Од учениците се барало да кажат колку тоа ги направило среќни и да изберат со кој колега би сакале да учествуваат во училишните активности. По четири седмици, двете групи изјавиле дека биле посреќни, но децата од втората група, кои требале да направат добро дело, кажале дека доживеале поголемо прифаќање на своите колеги и дека другите ученици почесто ги бирале нив за свои партнери во училишните активности.

„Вака едноставна интервенција не само што ги прави децата посреќни, туку и ги поттикнува меѓусебно повеќе да се поддржуваат и толерираат“, кажала Сонтер-Рајс.

Според нејзините зборови, насилството меѓу децата најчесто ескалира во 4 и 5 одделение. „Барајќи од учениците да се однесуваат љубезно кон околината, се надеваме дека ќе постигнеме децата во тие одделенија да се согласуваат, така намалувајќи ја тензијата, нетрпеливоста и насилството меѓу нив, посебно во таа возраст“, кажала таа.