Еден грабеж на бензинска пумпа во Виена стигна во весниците, но не поради украдените пари, ниту поради жртвите, туку поради многу невообичаеното однесување на ограбувачот.

Непознатото лице, кога влегло на бензинската пумпа, најпрво ги почестил вработените со чоколадо и им посакал „Среќен божиќ“.

Дури потоа, држејќи пиштол во раката побарал да му ги дадат парите. Меѓутоа, она што овој случај го прави уште побизарен е фактот што ограбувачот бензинската пумпа ја напуштил без пленот, кој го оставил на пултот.

„Такво нешто до сега не сум доживеал“, рече зачуден работник на бензинската пумпа. Тој кажал дека на ограбувачот сите пари му ги дал во пластичното ќесе кое го донел и го ставил на пултот.

Во меѓувреме, ограбувачот очигледно се предомислил и наместо да ги земе парите и да избега, тој само го вратил пиштолот во јакната, го оставил пленот и ја напуштил бензинската пумпа без збор.