Следната година глобалните температури ќе бидат со 0,57 степени над просекот на долг рок, што ќе ја направи 2013 година една од најжешките во историјата. Ова го покажуваат прогнозите на британската метеоролошка служба, пренесе Ројтерс...

"Многу е веројатно 2013 година да биде меѓу десетте најтопли години од 1850 година наваму. Најверојатно таа ќе биде потопла од 2012 година", се наведува во прогнозата на британските метеоролози за следната година.

Според податоците од извештајот на Светската метеоролошка организација (СМО), претставени на конференцијата на ОН за климатски промени, периодот од јануари до октомври 2012 година се покажа деветти на листата на најжешки за целата историја на метеоролошките набљудувања, кои започнуваат во 1850 година.

2012 година спаѓа во десетката на најтоплите години, без оглед на повременото "ладење", предизвикано од феноменот Ла Ниња, се вели во извештајот на организацијата. Просек за десетте месеци од годинава глобалната температура на површината на Земјата била со 0,45 степени повисока од просекот во 1961-1990 година до 14,2 степени Целзиусови.