Социјалната мрежа Twitter објави дека го поминала бројот од 200 милиони активни корисници, и тоа преку кратка твит порака на официјалниот профил.

„Сега има повеќе од 200 милиони активни корисници на Twitter сервисот месечно. Вие сте пулсот на планетава. Ви благодариме на поддршката“, пишува во пораката. Twitter, компанија со седиште во Сан Франциско, не е котирана на берзата и според тоа нема обрска да дава информации за својот бизнис.

Компанијата нема дадено проценка за бројот на своите корисници од септември 2010 година, кога е наведено дека има 145 милиони корисници. Меѓутоа, независната анализа на компанијата Sys-Con Media минатиот месец процени дека Twitter мрежата има повеќе од 465 милиони профили и дека се праќаат повеќе од 175 милиони твитови дневно.

Друга компанија специјализирана за социјални мрежи, Semiocast кон крајот на јули процени дека твитер има повеќе од 500 милиони профили, од тоа само 140 милиони во Америка. Сепак, како што наведува една агенција, тоа не значи дека сите тие профили се активни.

Twitter неодамна целосно го раскина партнерството со Instagram т.е. тоа го стори другата социјална мрежа, откако се претставени првите Twitter филтери и алатки за обработка и корекција на фотографии.