Замислете наместо преслатките сирупи, невкусните чаеви или лутите надразнувачи, кашлицата да ја лечите со црно чоколадо? Научниците работат токму на тоа.

Во Велика Британија се извршува клиничко испитување на делувањето против кашлицата на едно соединение кое во големи количини се наоѓа во црното чоколадо.

Британскиот професор Алин Морис, специјалист за кашлица, се надева дека чудотворниот лек против хроничното кашлање, чии симптоми не исчезнуваат ни по повеќе седмици и покрај терапијата, се наоѓа во чоколадото.

Морис моментално раководи со клиничко испитување во кое учествуваат 288 пациенти за да се испроба делотворноста на теоброминот, соединение кое во голема количина се наоѓа во црното чоколадо, а во помала количина во чајот.

Теоброминот делува инхибирачки на активноста на мозочниот нерв - вагус, што значително ја намалува појавата на рефлексот кој го предизвикува кашлањето.

Првите испитувања се навистина ветувачки, а доколку со клиничкото испитување кое ќе трае до крајот на 2013 година, се потврди делотворноста на производот, британската компанија Seek би можела потоа многу брзо да го комерцијализира.

Терапиите против кашлењето на база на теобромин веќе се одобрени за продажба во Јужна Кореја.