Лакот за коса е средство кое го користиме за да ја скротиме разбушавената коса и фризурата да ја наговориме да стои онака како што сакаме, но шишето кое крие леплива течност може да ви послужи и во уште неколку други ситуации...

1.Елиминатор на непријатни дамки
Било да е на кошулата или на некоја друга облека дамките од кармин знаат да бидат прилично незгодни, а лесно ќе ги отстраните со помош на лакот за коса. Напрскајте го местото на дамката и оставете да стои 10 минути а потоа истријте со суѓер. Облеката исперете ја во машина за перење алишта на темепратура соодветна за облеката за да го исчистите остатокот од спрејот.

2.Спасител на хулахопките
Лакот за коса може да го продолжи векот на траење на вашите омилени хулахопки. Подрачјето околу прстите најбрзо страда и доаѓа до пукање. Ако по секое перење тој дел го напрскате со лак за коса вашите хулахопки ќе потраат три пати подолго од вообичаениот период.

3.Заштитник од масни наслаги
Ако сакате детскиот цртеж кој сте одлучиле да го ставите на вратата од фрижидерот или кујноскиот ормар да го заштитите од трагите од масните прсти, напрскајте го со лак за коса. Малото уметничко дело поради лакот подолго ќе ја задржи постојаноста на бојата.

4.Чувар на нежните спомени
Доколку сте одлучиле да го задржите цвеќето или букетот кој ви е подарок од драга личност, кога ќе се исушат нежните цветови напрскајте ги со лак за коса, така ќе спречите да се распаднат.

5.Чистач на гума за џвакање
Со помош на лакот за коса можете брзо да се ослободите од гумата за џвакање од тепихот. Откако ќе ја напрскате со лак за коса таа ќе се стврдне и потоа едноставно ќе ја отстраните со помош на нож или некој друг остар предмет.

6.Безвременски адут за сјајни обувки
Омилените обувки ќе блеснат со помош на производот наменет првенствено за коса. Откако ќе ги исчистите вашите обувки може да ги напрскате со лак за коса за да им дадете дополнителен сјај. Овој трик вреди само за обувките чија површина е мазна.