Веќе нема лажење - нашиот нос, баш како оној на Пинокио, навистина оддава кога лажеме, откриле шпанските психолози од Универзитетот во Гранада.

Пинокио, дрвената кукла која по многу авантури станува момче, не е само јунак од истоимениот роман на Карло Колоди, туку и назив на поединечни феномени во медицината - Комплексот на Пинокио и синдромот на Пинокио.

Шпанските научници Елвира Салазар Лопез и Емилио Гомез Милан откриле со помош на термограф, уред кој ја мери температурата на делови од телото, дека кога лажеме нашиот нас отекува (наместо да се издолжува), додека температурата во него расте.

Овој феномен, кој го нарекле - ефектот на Пинокио, се јавува и кога ќе не обземе страв.

Салазар Лопез и Гомез Милан не ја мериле само температурата на носот, туку и на други делови од телото, па така откриле дека при изведување на фламенко, на танчерите им расте температурата во задникот, за потоа да се шири кон горните екстремитети.

„Тоа е термичкиот отисок на фламенкото и секој танц има свој специфичен отисок“, рече Салазар Лопез.

Исто така, научниците тврдат дека со овој метод можат да детектираат и сексуална желба. Според нив, порастот на либидото се манифестира со растење на температурата во гениталиите и градите и на жените и на мажите.