Познат светски футуролог смета дека компјутерите ќе станат поинтелигентни од луѓето и дека можеме да очекуваме „подлабока интеграција меѓу луѓето и компјутерите“.

Реј Курцвел е еден од најпознатите светски футуролози, коосновач на универзитетот Singularity, автор на неколку книги за вештачката интелигенција, здравјето и технолошката сингуларност и еден од заслужните за развој на софтверот кој тексуалниот запис го претвара во говор.

Неговата (радикална) визија за иднината е инспирирана од големиот технолошки напредок и на Business Insider велат дека, благодарение на производите на Google, како автомобили со кои управуваат компјутери и очила кои поддржуваат проширена реалност, неговите предвидувања денеска се се пореални.

Во својот говор на Демо конференцијата во Силицијската долина, Курцвел ги опиша своите предвидувања за иднината и очекува дека општеството до 2045 година ќе достигне состојба на технолошка сингуларност во која технологијата ќе овозможува создавање „надчовечки компјутерски интелигенции“ во кои можеме да очекуваме подлабока интеграција на луѓето и компјутерите - поради што, како што тоа го нагласи уште порано, луѓето би можеле да станат бесмртни.

Тој посебен акцент става токму на вештачката интелигенција и вели дека интелигенцијата на компјутерите до 2029 година ќе може да и парира на интелгенцијата на луѓето и дека компјутерите ќе можат да не насмеат и да не расплачат.

Исто така, верува дека во иднината постојано ќе живееме во проширена реалност, а благодарение на cloud технологијата со која ќе биде поврзан нашиот мозок, секогаш ќе можеме да учиме нови работи (и во староста), додека делови од нашето сеќавање ќе можеме да ги - избришеме.

Околу 2030 година, малите „наноботи“ со големина на крвни зрнца ќе можат да ги лекуваат и чуваат нашите органи, поради што луѓето ќе бидат попаметни и поздрави. Освен во подрачјето на проширената реалност, вештачката интелгенција и човечкото здравје, напредокот на технологијата ќе го промени и нашиот начин на производство и Курцвел верува дека во иднината голема важност во производството ќе бидат 3D принтерите - ќе постојат јавни 3D станици за принтање во кои луѓето ќе можат да испринтаат се што им треба - облека, играчки и други работи.