Симпатично куќно милениче, стабилен брак и добри пријатели се тајната на долговечноста, велат американските научници.

Мажите кои во позрели години купуваат куче живеат подолго, покажало истражувањето кое траело цели седум децении.

Група од 200 млади мажи се пријавила за истражување во далечната 1940 година. Научниците од Харвард ги следеле нивните животни навики, подеми и падови, и секои две години пријавувале детална анализа на нивната состојба.

Студијата покажала дека не е важно во какво семејство сте родени, кој ви е социјално-економскиот статус ниту колку пари заработувате. Важно е да имате куче, добра жена и добри пријатели.

Пораните истражувања покажале дека домашното милениче го продолжува животот, и дека имањето куче донесува повеќе задоволство од поседувањето мачка.

Покрај тоа што кучето морате да го шетате, и така ќе се рекреирате секој ден по неколку пати, вашето милениче ќе ви го подобри имунолошкиот систем, брзината на опоравување од инфекции, ќе ви го намали крвниот притисок и холестеролот.

„Долговечноста зависи од среќата, не од имотот. Работите кои ни го исполнуваат секојдневнието се клучни за долг и среќен живот“, рече моменталниот директор на студијата Џорџ Валијант од Харвард.

Тој рече дека во студијата биле опфатени 31 мажи без партнерки и дека до денеска преживеале само 4 од нив. Мажите во стабилни врски или брак имаат подобра статистика - третина од нив и денеска се живи и среќни.

„Среќата не е материјална стабилност, туку емоционална интелигенција, врска, радост и упорност“, рече Валијант.