Хостел во Амстердам се рекламира како најлошо сместување во светот.

Хостелот „Ханс Бринкер“ во Амстердам гордо се рекламира со слоганот „Ги разочаруваме муштериите веќе цели 40 години“. На сајтот можете да најдете описи на тенки душеци, излупени ѕидови и тапети, метални ормари и соби без поглед.

„Ние не сме евтин хостел за млади во Амстердам, туку многу повеќе од тоа. Ние сме евтин, валкан, ладен и недоволно осветлен хостел.“

„Ако сакате удобност рамна на онаа во затвор со минимално обезбедување, ние сме местото за вас. Уживајте во нашата кантина во која се содржи недоволно варени јајца, и воодушевувајте му се на фактот дека во некои од собите водоводните цевки дури работат“, се наведува во рекламата.

Еден од слоганите со кои „Ханс Бринкер“ им се додворува на потенцијалните гости е и „Сега имаме и кревет во секоја соба“.

Необичниот маркетинг вродил со плод, затоа што хостелот работи подобро од било кога.

„Муштериите го ценат нашиот сарказам и хумор, и овој вид маркетинг и се допаѓа на целна група, во главно на студенти и млади“, вели менаџерот Тејмен Ресевер.

На сајтот на „Ханс Бринкер“ се наоѓа и известување дека, од очигледни причини, хостелот не сносува одговорност за „болести од 18 век, нервни сломови, тровање со радијација и храна“ и други несреќи кои можат да ве снајдат по само едно ноќевање.