Ако сакате да ги „поништите“ последиците од слатките кои што сте ги изеле, доволно е да изгледате некој хорор филм, како The Shining, Shark или The Exorcist.

Колку што е филмот пострашен, толку е поефикасно губењето на калориите, тврдат научниците од Универзитетот во Вестминстер, наведувајќи дека со гледање на хорор филмови можеме да изгубиме исто толку калории колку и при едночасовно миење прозорци или получасовна прошетка.

Истражувачите следеле десет личности додека гледале класици од тој жанр на филмови. Притоа ги бележиле нивните пулсови и утврдиле дека за време на траењето на филмот, бројот на потрошени калории во просек се зголемил за третина.

Испитаниците за време на гледање на секој филм согореле, во просек, по 133 калории.

Резултатите од истражувањето покажале дека филмовите со сцени кои гледачите ги тераат да потскокнат од страв се најдобри за согорување на калории, затоа што тогаш срцето нагло ја забрзува работата.

„Секој од десетте прикажани филмови предизвика забрзување на пулсот кај испитаниците. Со забрзување на пулсот во телото доаѓа до налет на адреналин, а токму тој нагол проток на адреналин, предизвикан од интензивен стрес или во овој случај страв, го намалува апетитот, го забрзува метаболизмот и доведува до согорување на повеќе калории“, објасни водачот на студијата, д-р Ричард Мекензи.

Како најдобар лек против трупењето на калории се покажал филмот The Shining на Стенли Кјубрик од 1980 година со Џек Николсон во главната улога. Гледајќи го овој филм можете да изгубите дури 184 калории, што е еднакво на получасовно возење велосипед. Потоа следат Shark со 161 калории и The Exsorcist со 158 калории.