Децата помлади од три години не би требало времето да го поминуваат пред телевизор. Просечното дете во денешно време до седмиот роденден поминува вкупно цела година „залепено“ за екранот.
Ограничувањето на времето кое децата го поминуваат во гледањето телевизија допринесува до подобро здравје и поправилен психофизички развој, порачуваат лекарите. Просечното дете во денешно време до седниот роденден поминува вкупно цела година „залепено“ за екранот, а во текот на детството децата повеќе време поминуваат пред телевизорот отколку во училиште.
Неконтролираниот пристап до играчки, таблети, телевизија, смартфони и компјутери поврзан е со зголемената дебелост и зголемениот ризик од кардиоваскуларни болести и дијабетес тип 2, а просечното дете денеска пораснува пред пет различни видови монитори или екрани во куќата.
Изложеноста на разни содржина во мерка и на начин кој денеска е сосема вообичаен може да доведе до проблеми со фокусирањето на вниманието и други психолошки потешкотии, предупредува д-р Арик Зигман, развоен психолог.
„Намалувањето на вкупното време кое децата го поминуваат пред екранот, но и одложувањето на ‘пристапот’ до телевизијата до малку поголема возраст би донеле значајни предности кога станува збор за детската здравствена состојба, но и психолошки развој“, вели тој.
Премногу време пред екранот негативно влијае на способноста на децата подоцна да воспоставуваат добри односи со другите, како и на нивните социјални вештини.
Родителите денеска телевизијата често ја користат како „електронска бејбиситерка“, или нешто што на децата ќе им го пополни вниманието, но, без разлика на темпото на живот, лекарите предупредуваат дека на децата мора да им се ограничи времето кое го поминуваат пред екранот.
До третата година децата воопшто не би требало да гледаат телевизија, во возраста меѓу три и седум години таа активност треба да биде ограничена на околу половина час дневно, а меѓу седмата и дванаесеттата година во гледање на телевизиска програма децата можат да поминуваат околу час време во текот на денот, гласи препораката на лекарите.
